Ngayong araw na ito, sisimulan ko nang tuluyang kalimutan na ang pinakamamahal ko. Sa simula palang, handa na ako sa pwedeng mangyari. Inihanda ko na yung sarili ko sa labis na sakit at kalungkutan na mararamdaman ko. Ngayon, puputulin ko na yung pagmamahal na yun. Bawat masasayang minuto namin ay ituturing ko nalang na mga nakaw na sandali. Ituturing ko nalang ang nangyari bilang isang malaking pagkakamali.

Gusto kong magpaalam sa iba't ibang persona na ipinakita saken ng pinakamamahal ko. Ito yung iba't ibang stage ng pakikitungo nya sakin. Nais kong sabihin sa bawat persona na yun yung nilalaman ng puso ko.

Paalam White Knight

Sa simula palang alam kong parang napressure kita kasi binigyan kitang tag na White Knight ko. Alam kong hindi mo yun ginusto, at patawad dahil ginawa ko yun ng walang kaabog abog. Naging masaya naman ako na kahit sa maikling panahon, alam kong naging sincere ka sa pagiging White Knight mo. Alam ko, hindi ka na babalik simula nung nagkaron ka ng problema. Kaya sinubukan kong maging ako naman ang protector mo nung mga oras na yun habang pinagdarasal ko na bumalik ka pa din. Tama ka, you failed as my White Knight. Ayokong sabihin sayo yun dati kasi ayokong mawalan ka ng loob. Tiwala pa din kasi ako sayo. Pero ngayon na siguradong sigurado na ako na hindi ka na babalik, gusto kong sabihin sayo na kahit nagfail ka bilang White Knight, hindi yun kawalan sa pagkatao mo. Ikaw pa rin yun. Kahit anong gawin ko sa buhay ko, kahit makahanap pa ako ng iba pang mamahalin, ikaw lang si White Knight. Ikaw lang ang White Knight ko.

Paalam Superman

Kahit isang araw lang kita nakilala, dahil isang araw ko lang nalaman na ikaw na si Superman, masaya pa din akong nakilala kita. Naintindihan ko na kung bakit hindi masyadong nag-aalala yung mga kaibigan mo sayo. Napakastrong mo pala talaga kasi. Patawarin mo ako kung naging sagabal ako sayo. Kung nagiging dagdag na pasakit ako sayo kasi lagi akong nangungulet. Patawarin mo ako dahil minahal kita ng sobra sobra at naging dahilan yun kung bakit naghirap ang loob mo. Wala akong intensyon na maging burden sayo, hindi ko yun sinasadya. Gusto ko lang kasi sanang iparamdam sayo na mahal kita Superman, at susuportahan kita sa kahit anong problemang kakaharapin mo. Sa huli, hindi pala talaga ako ang Kryptonite mo. Ipagdarasal ko na makita mo yung Kryptonite mo, na gagawin ka muling tao.

Paalam angel

Pinakanalulungkot ako kasi kelangan na kitang pakawalan ng tuluyan. Matagal ka nang lumipad palayo, gagawin ko lang official ang pagkawala mo. Salamat angel kasi binigyan mo ako ng oras para pakinggan yung mga kwento mo. Marami pa akong gustong matutunan at malaman mula sa sayo pero alam kong hindi na maaaring mangyari pa yun. Marami tayong mga pangarap na hindi na matutupad. Marami nang mga bagay na naisip natin na hindi na natin pwedeng gawin. Nanghihinayang talaga ako sa mga bagay na yun. Pero meron akong itutuloy na isa. Yung Project enREACH. Alam kong magandang project yun kaya kahit ako lang mag-isa, itutuloy ko pa din sya. Isasama pa din kita bilang isa sa founders nun dahil hindi naman mabubuo yun kung wala ka. Angel, susubukan ko tuparin yung mga napag-usapan natin patungkol sa passion natin kahit mag-isa lang ako. Kahit hindi mo ako matulungan physically, sana naman ipagdasal mo na magtagumpay ako. Igigive up man kita, hindi ko pa rin tuluyang ilelet go ang mga pangarap natin.

Paalam Prince Charming

Paalam na Prince Charming. Salamat pinagbigyan mo akong makita kung sino ka talaga. Alam ko nung mga unang araw na bumalik ka sa buhay ko, totoo lahat ng sinabi mo. Alam ko nung mga araw na yun, sinasabi mo yung totoong nasa puso mo. At naging masaya ako kasi kahit papaano, masasabi akong napabilang ako sa mga taong pinagkakatiwalaan mo. Ikaw lang yung lalaking nagpakilig sakin ng ganito. Aaminin ko, simula nung napagpasyahan kong magpaangkin sayo, naging loyal talaga ako sayo. Kahit na maraming nagpaparamdam, ikaw pa rin ang iniisip ko. At kahit na sexually attracted din ako sayo, natabunan sya ng nag-uumapaw na damdamin ko para sayo. Pero hindi ako nagsisisi. Gusto lang kitang mag-ingat. Alam ko naman na kilala mo ako. Matapos ito, sigurado akong mawawala na si Betong nakilala mo. Unti-unti ko nang nararamdaman yung pagshift ng personality ko. Pero lagi mong iisipin na mahal na mahal na mahal ka ni Betong. Yun nga lang, hindi na sya babalik. Nagdesisyon na akong tumawid sa bridge. Hindi nako babalik. Salamat Prince Charming na kahit sa maikling sandali, napaligaya mo ako. Salamat. Salamat.



Paalam na sa lalaking pinakamamahal ko... May You Kindle Every Love...